08.02.2024
“Смак роднай мовы”
Па добрай традыцыі, кожны чацвер у ДУА “Дзіцячы сад № 7 г. Ганцавiчы“з самага ранку гучыць родная беларуская мова. І гэта – не выпадкова, таму што па чацвяргах ва ўстанове дашкольнай адукацыі праводзяцца беларускамоўныя дні.
Такі дзень адбыўся і 8 лютага. Ён быў тэматычны, вельмі незвычайны, цікавы, разнастайны і меў назву “Смак роднай мовы”. Мэта сённяшняга дня – развіццё грамадзянска-патрыятычнай пазіцыі выхаванцаў, далучэнне іх да шматвяковых традыцый кулінарнай культуры нашай краіны.
На працягу ўсяго дня дзяўчынкі і хлопчыкі старэйшых груп бліжэй знаёміліся з народнымі традыцыямі і нацыянальнымі стравамі беларускай кухні, яе асаблівасцямі і сакрэтамі.
Разам з Гаспадынькамі Ганнай і Акулінай (выхавацелі дашкольнай адукацыі Станкевіч Жанна Мікалаеўна, Пашкевіч Вольга Васільеўна) рабяты сталі ўдзельнікамі сюжэтна-ролевай гульні «Беларуская кухня», пазнаёміліся з традыцыйнымі беларускімі стравамі: дранікамі, халоднікам, клёцкамі, скваркамі, налістнікамі, а таксама прадуктамі, неабходнымі для іх прыгатавання. Акрамя гэтага, хлопчыкі і дзяўчынкі з задавальненнем гулялі ў гульні «Боршч беларускі», «Знайдзі лішні прадукт», «Гаршчок, вары!», «Гарлачык», адгадвалі загадкі, расказвалі пра стравы, якія гатуюць у іх сям'і…
Самым уражлівым у сённяшнім дні для хлопчыкаў і дзяўчынак стала экскурсія на харчаблок дзіцячага сада. Кухары Селіванава Наталля Васільеўна, Руднікевіч Алена Мікалаеўна, Клявец Ала Міхайлаўна паказалі "ўжывую", як гатуюцца смачныя і карысныя стравы ў дзіцячым садку: рыбны суп, галубцы; як замешваецца цеста для бліноў. З цікавасцю выхаванцы назіралі, як праводзіцца чыстка бульбы ў вялікай колькасці для таго, каб накарміць усіх дзяцей дзіцячага сада.
У абедзенны час нашы маленькія дзяўчынкі і хлопчыкі з апетытам елі стравы, клапатліва прыгатаваныя супрацоўнікамі харчаблока нашай установы дашкольнай адукацыі.
У выніку праведзенай працы, нашы выхаванцы змаглі пашырыць і ўзбагаціць свой слоўнікавы запас на роднай мове, а таксама ўсе мерапрыемствы дня дапамаглі ўсвядоміць сваю прыналежнасць да беларускай нацыі, яе культурнай спадчыны.
Дзень атрымаўся насычаным, пазнавальным і прынёс дзецям новыя веды і яркія ўражанні!