09.02.2023
“З любоўю да роднага слова…”
9 лютага ў нашым дзіцячым садку адбыўся беларускамоўны дзень пад назвай “З любоўю да роднага слова…”, дэвізам якога сталі наступныя словы – “Рускай мове дай разгрузку : размаўляй па-беларуску!”
Ён прайшоў незвычайна – у форме флэшмоба “Маё любімае слова на беларускай мове”. Пасыл мерапрыемства – узбагачаць слоўнік выхаванцаў рознымі мелагучнымі беларускімі словамі, пабуджаць да выкарыстання іх у актыўных маўленчых зносінах.
К правядзенню беларускамоўнага дня педагогі, дзеці і іх бацькі рыхтаваліся на працягу тыдня. Выхаванцам чыталіся творы мастацкай літаратуры розных жанраў на беларускай мове: казкі, вершы, забаўлянкі, лічылкі, прыказкі, прымаўкі. Гэта рабілася для таго, каб зацікавіць хлопчыкаў і дзяўчынак якім-небудзь беларускім словам, выклікаць жаданне даведацца аб яго значэнні, навучыцца яго вымаўляць. Выбраўшы слова, дзеці збіралі ўсю неабходную інфармацыю пра яго: як гучыць на беларускай мове, што абазначае, дзе сустракаецца, як ужываецца… Пры гэтым рабяты і дарослыя выкарыстоўвалі слоўнікі, вучэбную і навуковую літаратуру, інтэрнэт. Вынікам даследчай дзейнасці сталі сумесныя малюнкі, галоўнымі героямі якіх былі вывучаныя беларускія словы.
У флэшмобе прынялі ўдзел выхаванцы малодшых, сярэдніх і старэйшых груп. Малюнкі атрымаліся прыгожыя, яркія, не падобныя адзін на другі. З іх была арганізавана флэшмоб-выстаўка, дзякуючы якой усе ўдзельнікі сённяшняга дня змаглі пазнаёміцца з мноствам беларускіх слоў, іх гучаннем на роднай мове.
Флэшмоб даў магчымасць у іншы раз дакрануцца да багацця, прыгажосці і мелагучнасці мовы бацькоў, пашырыць слоўнікавы запас дзяцей, ужываць вывучаныя беларускія словы ў простых сказах, выкарыстоўваць іх пры адказах на пытанні. Акрамя гэтага, выхаванцы змаглі папрактыкавацца ў развіцці сваіх творчых здольнасцяў і ва ўдасканальванні мастацкага ўспрымання.
